Tre të vrarë në sulmin ndaj shtëpisë botuese të biblës në Turqi

Rritja e nacionalizmit dhe armiqësisë midis pakicave fetare është fajësuar për një incident të ri në Turqi.

(The Guardian, Independent, Telegraph - 19/04/07; AP, Reuters, DPA, BBC, VOA, FT, International Herald Tribune - 18/04/07)

Tre punonjës të një kompanie që shtyp dhe shpërndan biblën u vranë të mërkurën (18 prill) në Turqi në sulmin e fundit ndaj pakicës së krishterë të vendit.

Viktimat, dy turq dhe një gjerman u gjetën në godinën e shtëpisë botuese Zirve në qytetin juglindor Malatja të Turqisë, me duar e këmbë të lidhura dhe grykët të prera. Guvernatori i krahinës, Halil Ibrahim Dasoz tha në komentet në televizion se një nga turqit ishte ende gjallë kur u gjet por vdiq më pas në spital.

Viktima gjermane e identifikuar nga agjensia shtetërore e lajmeve Anatolia si 46-vjeçari Tilman Ekert Geskem, jetonte në Malatja që nga viti 2003, thanë zyrtarët. Dy viktimat e tjera u identifikuan si Nexhati Ajdin dhe Ugur Juksel.

Drejtori menazher i Zirve, Hamza Ozant i tha CNN-Turk se ata po konsideronin kërkimin e mbrojtjes së policisë pas kërcënimeve të kohëve të fundit.

Pastori evangjelist me bazë në Stamboll, Karlos Madrigal i tha Reuters se të tre qenë protestanë evangjelistë që ai i njihte.

Kryeministri turk Rexhep Tajip Erdogan, vendi i të cilit po kërkon anëtarësimin në BE por të cilit i është kërkuar shpesh nga Brukseli të sigurojë mbrojtje më të madhe të lirive fetare e të pakicave të tjera, e dënoi sulmin duke e quajtur si një "barbari".

Katër turq, në moshë 19 deri 20 vjeç u arrestuan me dyshimin e përfshirjes në incident dhe një i dyshuar i pestë u çua në spital me plagë serioze që i mori pas hedhjes nga dritarja në orvatje për t'i shpëtuar arrestimit. Sipas agjensisë Anatolia, ata të gjithë u gjetën të mbanin një letër që shkruante: "Ne të pestë jemi vëllezër. Ne po shkojmë drejt vdekjeve tona."

Duke folur në një konferencë shtypi transmetuar në televizionin kombëtar, ministri i brendshëm Abdulkadir Aksu tha se disa nga të dyshuarit mbanin armë.

CNN raporton se pesë vetë të tjerë u arrestuan të enjten në lidhje me vrasjet.

Duke dënuar sulmin, ministri i jashtëm gjerman Frank-Uollter Shtainmajer vendi i të cilit mban aktualisht presidencën e rradhës të BE, i kërkoi autoriteteve turke të bëjnë çmos "për të sqaruar krejtësisht këtë krim dhe të shpien në drejtësi përgjegjësit".

Gjykuar nga mënyra e vrasjes, hetuesit turq dyshuan se vrasësit mund të kishin lidhje me Hizbollah turke, një grup islamik kurd që lufton për të krijuar një shtet musliman në jugëlindjen turke të mbizotëruar nga kurdët.

"Këta janë fanatikë që vazhdojnë të jenë të pranishëm në Turqi dhe që në çast dalin me akte të dhunës absurde," u citua të thoshte në komentet për vrasjet e së mërkurës, monsinjor Luixhi Padoveze, përfaqësuesi i Vatikanit në Turqi.

Incidenti i ri erdhi midis shqetësimeve në rritje rreth ngritjes së nacionalizmit në Turqi, ku një i ri vrau një prift katolik rreth 14 muaj më parë. Disa muaj më pas, dy priftërinj të tjerë u sulmuan. Në një tjetër incident tronditës, gazetari i shquar turk-armen Hrant Dink u vra jashtë zyrës së tij në janar, në Stamboll.

Komuniteti i krishterë i Turqisë llogaritet për më pak se 1% të popullsisë 70 milionëshe të vendit, shumica e tyre muslimane.

"Në disa drejtime gjendja është përmirësuar sepse ne kemi të drejta ligjore...por ka pjesë të shoqërisë që janë radikalizuar," tha Madrigal, kisha e të cilit është nën mbrojtjen e policisë që nga vrasja e Dink e cila u dënua në masë nga populli.

Më tepër se 100,000 turq ndoqën funeralin e gazetarit në Stamboll. Sipas raportit të AP, rreth 150 vetë marshuan në qytetin më të madh të vendit të mërkurën për të protestuar për vrasjet e reja duke shprehur solidaritetin e tyre duke mbajtur parulla ku shkruhej: "Ne jemi të gjithë të krishterë".

© Copyright Të Krishterët Përgjigjen
Faqja Kryesore | Kush Jemi | Të Rejat | Kontakt | Kërko
"Të jini gjithëherë të gatshëm t'u jipni përgjigje çdo njërit që kërkon nga ju shpjegime per shpresën që ju keni (1 Pjetrit 3:15)"